Nace Cinema Rabudo, a primeira mostra galega de audiovisual inconformista

A ONGD Agareso organiza esta cita, co apoio da Deputación da Coruña e da Consellería de Política Social da Xunta de Galicia

Os Multicines Compostela acollerán as proxeccións de 8 filmes, do 22 ao 26 de novembro, ás 20h, e a entrada será gratuíta

Cinema Rabudo nace en Santiago de Compostela co fin de xerar un espazo de encontro para o audiovisual crítico e inconformista e incitar o debate e a reflexión sobre problemáticas sociais de actualidade. Feminismos, ecoloxismo, dereitos humanos, multiculturalidade e migracións son algúns dos temas que se tratan nas oito pezas que se proxectarán entre o 22 e o 26 de novembro nos Multicines Compostela, sempre ás 20:00h, con entrada libre e de balde ata completar aforo.

A mostra, organizada por Agareso –Asociación Galega de Comunicación para o Cambio Social– ademais da proxección dos filmes, tamén contará coa participación –presencial ou virtual– da maioría das autoras e autores das obras, con quen o público terá a oportunidade de charlar ao rematar as pezas.

O primeiro día da Mostra, luns 22 de novembro, O Cinema Rabudo iniciará a súa andaina coa proxección de catro curtametraxes. Unha delas El amargo sabor de las naranjas foi realizada por estudantes do Seminario de Comunicación Social e Cooperación Internacional de Agareso e A Asamblea de Cooperación pola Paz –ACPP-. A peza, gravada en Lepe, narra as duras condicións de vida dos temporeiros da froita. A esta curta acompañarana outras tres, gañadoras do último certame audiovisual EDITA: Las flores que arrancas, Je suis nue e O afeto e a rúa.

O martes 23 estrearase en Santiago o documental Garantía de Vida, que denuncia as consecuencias que ten sobre a vida das mulleres a prohibición total do aborto na República Dominicana. Na peza, as vítimas ou as súas familias contan, a través da súa experiencia, o que supón vivir baixo o marco dunha lei que impide a interrupción do embarazo en tódolos supostos. Ademais, o documental segue de cerca a loita das mulleres dominicanas para a despenalización do aborto en tres causais.

A terceira xornada de proxeccións, mércores 24, é a quenda do documental Cholitas que amosa a vida de cinco mulleres indíxenas que coas súas vestimentas tradicionais lograron ascender os 6.962 metros do Aconcagua, a montaña máis alta de América. Despois da longametraxe, o público terá a oportunidade de falar co co-director, Jaime Murciego.

O xoves 25, o Cinema Rabudo adentrarase na realidade das persoas migrantes que cruzaron o Mediterráneo estes anos tratando de chegar a Europa a través do documental Cartas Mojadas. A peza conta, a través dunha voz misteriosa dende o fondo do mar, a epopea máis tráxica da nosa historia contemporánea.

Pechará a I Mostra Galega de Audiovisual Inconformista, a proxección, o venres 26, o documental #boza, un selfie en primeira persoa do plural sobre as migracións. Boza é a sonada palabra que moitas persoas migrantes berran ao chegaren a Europa pero, que significa realmente? Cando se cumpre de verdade o soño de boza? Chégase algún día? Alhassane, Aminata, Mamadou, Mariam e Yahya explican en primeira persoa e coas súas propias imaxes o seu periplo cara Europa.








PROGRAMA COMPLETO

Luns 22
Proxección das curtas gañadoras do último certame audiovisual EDITA
Las Flores que arrancas
Je suis nue
O afeto e a rúa
E estrea de El amargo sabor de las Naranjas, curta documental sobre as duras condicións de vida das e dos temporeiros da froita realizada polo alumnado do Seminario de Comunicación Social e Cooperación Internacional. Coa presenza de Francisco Rodríguez e Coral Piñeiro.

Martes 23
Garantía de Vida, documental que denuncia as consecuencias que ten sobre a vida das mulleres a prohibición total do aborto vixente na República Dominicana, co equipo das produtoras (Agareso e ACPP).

Mércores 24
Cholitas, documental que amosa o duro ascenso de cinco mulleres indíxenas ao Aconcagua, co director Jaime Murciego.

Xoves 25
Cartas Mojadas, documental que retrata a epopea máis tráxica da nosa historia contemporánea, coa directora Paula Palacios (online).

Venres 26
#Boza, un selfie en primeira persoa do plural sobre as migracións, coa directora Anna Surinyach.

___
Todas as proxeccións comezan ás 20h nos Multicines Compostela e a entrada é libre e gratuíta até completar aforo.

Artículo Anterior Artículo Siguiente
"rbtribuna") Por el final de las absurdas fronteras (políticas, sociales, burocráticas, económicas...) que aún subsisten entre España (singularmente Galicia) y Portugal...y que tanto perjudican a la ciudadanía ibérica