Original iniciativa en Vigo) Nace «Banda á Feira» para llenar de cómic O Calvario


Nace «Banda á Feira» para encher de cómic o Calvario (Vigo)

O evento celebrarase durante os días 4 e 5 de xuño ao longo da peonil de Urzáiz.

O cartel é obra de Das Pastoras, un histórico do cómic internacional.

A próxima fin de semana do sábado 4 e domingo 5 de xuño celebrarase a primeira edición de Banda á Feira, un evento organizado pola Asociación de Veciños do Calvario, Vigo, e que pretende achegar o cómic aos vigueses sacándoo ás rúas.

Recoñecéndose como un evento humilde e coa filosofía clara de facer que todo o mundo poida gozar do cómic, Banda á Feira propón dous días nos que haberá charlas, talleres para os máis pequenos e varias exposicións dispostas ao longo da zona peonil da rúa Urzáiz, nos arredores do Mercado do Calvario.

Durante estas dúas xornadas visitarán a cidade varios autores do panorama nacional como Borja González (The black holes, Grito nocturno), Mayte Alvarado (La isla), Carles Dalmau (Planeta Manga) ou Anabel Colazo (Encuentros cercanos, Espada) e entre todos eles compoñerase unha exposición ao aire libre que encherá de arte as rúas do barrio. Exposición que se completará cunha mostra de «Subnormal», o cómic sobre acoso escolar dos vigueses Fernando Llor e Miguel Porto.

Deste xeito, Banda á Feira quere celebrar o amor polas viñetas e xerar unha cita anual que aos poucos vaia fixándose no calendario dos apaixonados polo que se coñece coma a novena arte.

Unha foto de familia de personaxes emblemáticos

O cartel para esta primeira edición de Banda á Feira é obra de Julio Martínez, coñecido artisticamente como Das Pastoras, e con gran arraigamento na cidade olívica, unha auténtica lenda do mundo do cómic que traballou en grandes compañías como Marvel ou participou en títulos inesquecibles como La casta de los metabarones xunto a Alejandro Jodorowsky.

A intención do cartel é a de mostrar unha celebración, unha festa en torno ao cómic que ten a varios personaxes emblemáticos como protagonistas fronte a un dos enclaves máis recoñecibles e con máis historia do barrio: o Mercado.

Nos próximos días coñeceranse os detalles e o horario de todas as actividades previstas de Banda á Feira, que encherán o Calvario de cómics a primeira fin de semana de xuño.

Banda á feira é un evento creado pola Asociación de Veciños do Calvario coa intención de sacar o cómic á rúa e mostrar todas as súas capacidades artísticas dende a celebración cultural e nunha contorna inmellorable.

Organizan:

Raúl Fontán – presidente da Asociación de Veciños do Calvario
Félix Rodríguez – organizador
Melo – organizador
Fernando Llor – organizador