O Xeocámping de Ribas de Sil xa está en funcionamento como novo referente do turismo sostible no Courel

O Xeocámping Montañas do Courel xa está en marcha. Desde principios de agosto, veciñanza e visitantes xa gozan dun espazo único para o descanso, o lecer e a aprendizaxe no corazón do Xeoparque Montañas do Courel. Promovido polo Concello de Ribas de Sil e xestionado por Aventeira S. Coop. Galega, este proxecto pioneiro en Galicia materializa unha aposta decidida por un turismo sostible, educativo e transformador, comprometido co territorio e coa posta en valor do patrimonio natural e cultural.

Situado nun enclave privilexiado, o Xeocámping conta con 7 bungalows, 8 parcelas de acampada, unha zona de acampada libre, e un espazo acondicionado para caravanas e autocaravanas. En total, máis de 70 prazas que ofrecen unha alternativa cómoda e accesible para todas aquelas persoas e grupos que desexen coñecer unha das zonas de maior riqueza xeolóxica e paisaxística de Galicia.

As instalacións complétanse coa recepción, sala común, comedor, vestiarios, parque infantil, piscina, área de barbacoas e zona de lavado de vehículos. Todo o conxunto está pensado para garantir o confort das persoas usuarias respectando a contorna, integrándose na paisaxe e cumprindo cos criterios establecidos pola normativa turística galega.


O complexo alberga tamén o CIMAR (Centro de Interpretación da Minería Aurífera Romana), un equipamento divulgativo que permite mergullarse na historia e comprender a profunda pegada da minería romana no territorio. Con paneis expositivos, maquetas, materiais didácticos e propostas interactivas, o centro ofrece unha experiencia inmersiva e accesible para todos os públicos.

O Xeocámping non é só un aloxamento turístico. É un espazo con alma, froito da traxectoria de Aventeira, unha cooperativa galega sen ánimo de lucro con longa experiencia no eido da educación no tempo libre, a animación sociocultural e a promoción dos valores de igualdade, sustentabilidade e cooperación. A súa programación incluirá actividades organizadas, obradoiros e propostas formativas dirixidas tanto a centros educativos e entidades sociais como ao público visitante.

Este novo proxecto de dinamización local conta co apoio do Fondo Social Europeo Plus (FSE+). O obxectivo é contribuír á creación de emprego, á fixación de poboación e á valorización do rural, sumándose ás rutas de sendeirismo, ás actividades de montaña e ao conxunto de iniciativas que fan de Ribas de Sil un destino privilexiado para o ecoturismo.

Coa súa apertura, o Xeocámping marca o inicio dunha nova etapa para a comarca: un lugar para gozar, aprender e descubrir. As reservas poden realizarse xa a través do sitio web www.xeocamping.com. Durmir baixo as estrelas no corazón do Courel é, desde agora, unha realidade.