El Colegio de Periodistas de Galicia hace frente al polémico alcalde de Ourense...
O Colexio de Xornalistas e a Asociación de Fotoxornalistas esixen ao Concello de Ourense que non limite a toma de imaxes nos plenos |
A Xunta de Goberno do Colexio Profesional de Xornalistas de Galicia e a Asociación Profesional de Fotoxornalistas de Galicia (APFG) manifestan a súa oposición ao anuncio do Concello de Ourense de que limitará a toma de imaxes fotográficas aos cinco primeiros minutos dos plenos municipais, e reclámanlle á institución que desista da súa pretensión. A medida, un paso máis na confrontación do alcalde de Ourense cos medios, non só limita inxustificadamente o dereito á información sobre un acto público, senón que é contraria á lexislación e podería ser nula de pleno dereito. |
O mércores 26 de novembro, o Concello de Ourense informaba, a través dunha nota de prensa, de que a toma de imaxes e fotografías por parte dos profesionais dos medios de comunicación nos plenos municipais se limitaría a partir de agora aos "primeiros cinco minutos de cada sesión", restrinxíndose as imaxes dispoñíbeis do resto ao sinal que a institución facilita a través da súa conta de Vimeo. O anuncio viña encadrado na situación producida no pleno do concello dous días antes, cando o alcalde, Gonzalo Pérez Jácome, recriminaba a un fotoxornalista por, segundo el, enfocalo coa cámara durante demasiado tempo.
O Colexio Profesional de Xornalistas de Galicia e a Asociación Profesional de Fotoxornalistas de Galicia condenan este novo episodio da confrontación permanente que mantén o rexedor de Ourense co conxunto de profesionais dos medios de comunicación. Como xa lle temos lembrado en numerosas ocasións, as e os xornalistas cumpren un papel esencial de mediación entre a cidadanía e os seus representantes políticos, e de fiscalización da actividade institucional. Os cargos públicos non só non deben impedir ou atacar un traballo, o xornalístico, imprescindíbel para o desenvolvemento da democracia, senón que, aínda máis, teñen a obriga de facilitalo e someterse ao seu escrutinio. Neste caso, a situación cobra características máis graves, ao limitarse o traballo das e dos profesionais nuns actos públicos e tan centrais no desenvolvemento da política municipal como son os plenos do concello. Esta decisión, totalmente arbitraria, priva a cidadanía de Ourense de información gráfica sobre o labor dos seus representantes políticos, e na práctica deixa o control sobre calquera imaxe en mans unicamente do partido no goberno.
Esta pretensión é ademais totalmente contraria a dereito, posto que vulnera tanto o artigo 70.1 da Lei Reguladora das Bases do Réxime Local, que estabelece como regra xeral a publicidade real e efectiva das sesións plenarias, como o artigo 20.2 da Constitución, que impide a censura previa. O Tribunal Supremo, en sentenza do 11 de maio de 2007 xa estabeleceu que reservar en exclusiva aos servizos municipais a gravación e difusión dos plenos implicaba unha sorte de censura previa; mentres que noutra resolución do 24 de xuño de 2015 declarou que non pode haber ningunha restrición ao dereito da cidadanía ao coñecemento dos plenos, agás naqueles declarados reservados de maneira excepcional, e afirmou a nulidade de pleno dereito da prohibición de gravacións. De maneira semellante, o Constitucional declarou incompatible coa liberdade de información (en sentenzas como STC 6/1981, 12/1982, 104/1986, 20/1990, 159/2005 ou 87/1999), calquera réxime de “prohibición xeral con reserva de autorización” para o acceso de cámaras ou a difusión de información sobre actos públicos. E a xurisprudencia lembra que a presidencia do pleno non pode prohibir de maneira absoluta a gravación, unicamente aquelas actuacións que impliquen unha alteración real da orde, algo que non consta neste caso, no que existe apenas unha incomodidade subxectiva do alcalde.
Por todo isto, o Colexio Profesional de Xornalistas de Galicia e a Asociación Profesional de Fotoxornalistas de Galicia rexeitan tallantemente esta nova tentativa de restrinxir o labor xornalístico por parte do Concello de Ourense e esixen que o goberno municipal desista da súa pretensión e dea marcha atrás inmediata á limitación intolerábel da toma de imaxes nos plenos, sen que esta chegue a entrar nunca en vigor. No caso contrario, veriámonos obrigados a reclamar a nulidade de pleno dereito da decisión municipal.
COLEXIO PROFESIONAL DE XORNALISTAS DE GALICIA |