No día 1 entraron en vigor os orzamentos da Comunidade Autónoma de Galicia para este ano 2026 que ascenden a 14.240 millóns de euros.

Galicia aprobou as súas contas, un ano máis, en tempo e forma, e foi a primeira Comunidade en facelo.

As contas autonómicas superan os 14.000 millóns de euros e a principal prioridade do Goberno galego é o gasto social. Tres de cada catro euros dedícanse a sanidade, educación e política social, así como para levar a cabo políticas de emprego para impulsar o crecemento futuro de Galicia.

Os orzamentos para este ano continúan co impulso á vivenda, co compromiso do Goberno galego de duplicar o parque de promoción pública e pasar de 4.000 a 8.000 vivendas sociais, das que 3.000 están xa en marcha. Así mesmo, seguirase co programa de alugueiro e coas axudas para mercar baixos comerciais e transformalos en vivenda pública, así como para a rehabilitación de vivendas no rural.
Este impulso á vivenda refórzase tamén con rebaixas fiscais para as familias monoparentais. Estas súmanse aos outros colectivos prioritarios -rendas medias e baixas, menores de 36 anos, familias numerosas e colectivos vulnerables-, que poden adquirir vivendas cunha redución do imposto de transmisións patrimoniais (ITP), o cal pode chegar ata a súa eliminación.

Aproveitando unha figura exclusiva do Dereito Civil galego, o contrato vitalicio, rebáixase a tributación para aqueles que cedan un inmoble á persoa que os coide. E increméntase o límite do prezo da vivenda de 200.000 a 240.000 euros, máis 30.000 euros por membro da unidade familiar, para poder beneficiarse dos tipos reducidos do Imposto de Transmisións Patrimoniais e Actos Xurídicos Documentados (ITPAXD).

Novas rebaixas fiscais

As novas rebaixas fiscais volven centrarse nos colectivos máis vulnerables, como a eliminación no IRPF da cota íntegra autonómica das axudas aos afectados por ELA, ou a dos impostos ás persoas prexudicadas polos incendios do verán, así como as deducións para libros e material escolar. Os orzamentos do ano que vén, ademais, consolidarán todas as rebaixas fiscais postas en marcha ata o momento.

Sector produtivo e aposta pola innovación

As contas galegas para o vindeiro ano apostan tamén pola economía produtiva para xerar emprego estable e de calidade, e para que Galicia siga sendo punteira en sectores estratéxicos como a automoción, o naval, a cadea mar-industria e a seguridade. Da man da innovación, con algo máis de 400 M€ para o desenvolvemento de iniciativas no eido do I+D+i, Galicia seguirá apostando por infraestruturas e tecnoloxías de última xeración como a Factoría IA, o Cesga, o Polo de Rozas, a creación da Fundación Galtia ou a posta en marcha do primeiro Centro de Protonterapia e de CAR-T.

As contas de 2026 serán as terceiras de xeito consecutivo que non teñen endebedamento, xa que o Goberno galego blindou a solvencia e a sustentabilidade das contas públicas. Deste xeito, continúase unha senda descendente da ratio débeda/PIB que se prevé que se achegue ao 13% en 2026, catro anos antes do obxectivo previsto inicialmente para 2030.

En resumo, os orzamentos de Galicia para 2026 buscan consolidar un crecemento económico sostible, creando emprego de calidade, seguir impulsando a vivenda e reforzando o gasto social, afianzar o ensino gratuíto desde a escola infantil ata a universidade, continuar coa modernización dos sectores produtivos apostando pola innovación e o talento, poñendo atención no coidado do territorio e garantindo un turismo sostible na preparación do Xacobeo 2027. E todo, para contribuír á senda de plena converxencia deseñada no Plan Estratéxico de Galicia 2030.