O secretario xeral da Organización das Nacións Unidas (ONU), António Guterres, vén de presentar na sede da organización o seu informe anual Cooperación coas Nacións Unidas, os seus representantes e os mecanismos no eido dos dereitos humanos, que recolle as tendencias e recomendacións no traballo en defensa do respecto dos dereitos humanos entre o 1 de maio de 2021 e o 30 de abril de 2022. O relatorio recolle unha serie de "tendencias preocupantes" e detalla como moitas das persoas que facilitaron información á ONU (principalmente, vítimas de violacións de dereitos humanos, activistas e xornalistas) sufriron represalias e intimidación por parte dos Estados e os axentes paraestatais.

Na presentación, Ilze Brands Kehris, asistente do secretario xeral en cuestión de dereitos humanos, destacaba que este tipo de situacións "non son casos aillados", senón que a "incidentes similares repetidos ao longo de múltiples anos poden sinalar tendencias". Entre estas, o informe salienta algunhas como a vixilancia, tanto online como offline, dos colaboradores coas Nacións Unidas; o uso de lexislación restritiva xustificada na loita contra o terrorismo, en cuestións de seguridade nacional ou en leis reguladoras das actividades da sociedade civil; e a autocensura, que leva a moitas persoas a non compartir información ou facelo unicamente de forma anónima. 

Os 42 países aos que se refire o informe son Afganistán, Andorra, Arabia Saudita, Bahrein, Bangladesh, Belarús, o Brasil, Burundi, Camerún, Casaquistán, China, Chipre, Cuba, Djibuti, os Emiratos Árabes Unidos, Exipto, as Filipinas, Guatemala, o Iemen, a India, Indonesia, Irán, Israel, Laos, Libia, as Maldivas, Malí, Marrocos, México, Myanmar, Nicaragua, Palestina, a República Democrática do Congo, Rusia, Ruanda, Sri Lanka, Sudán, Sudán do Sur, Tailandia, Turkmenistán, Venezuela e Vietnam.

CPXG