r b tribuna. LaMontagne & PicoAmperio estrean single e videoclip de “Porque no mundo” Este é o segundo adianto do que será o primeiro d...
rbtribuna.
LaMontagne & PicoAmperio estrean single e videoclip de “Porque no mundo”
Este é o segundo adianto do que será o primeiro disco da banda, “Algo que sinalar”, que verá a luz o próximo 8 de novembro. O tema xa está dispoñible en todas as plataformas dixitais e o vídeo na súa canle de Youtube.
Nel, a voz de LaMontagne e os loops de PicoAmperio conseguen unha vez máis que o público se teletransporte a un universo híbrido, único, hipnótico e absolutamente magnético.
LaMontagne & PicoAmperio presentan single e videoclip de “Porque no mundo” o segundo adianto do que será o seu primeiro disco, “Algo que sinalar”, que verá a luz o próximo 8 de novembro. O tema -unha reinterpretación da cantiga de Airas Nunes “Porque no mundo menguou a verdade”-xa está dispoñible en todas as plataformas dixitais e o vídeo dispoñible na canle de Youtube da banda.
A peza audiovisual, que corre da conta de Trece Amarillo e foi filmada en lugares como Guitiriz, a aldea de Aceredo, Ribadumia, Carboeiro ou Santiago de Compostela, é para LaMontagne & PicoAmperio “similar ao relato dun videoxogo”, contan, “porque está situada nun escenario distópico e conta con elementos de búsqueda, consello e fase final, só que neste caso esa fase final non se supera e a protagonista cae na súa propia desesperación. É moi potente esteticamente”.
Co seu imaxinario electrónico, LaMontagne & PicoAmperio continúan a destruír fronteiras temporais e estilísticas e abrindo novos camiños neste proxecto multiforme a través do hip hop, o abstract ambient, o folclore, melodías suaves ou atmosferas rascadas. Este tema é un adianto do novo disco do dúo, “Algo que sinalar”, que verá a luz o próximo 8 de novembro. “Sentimos orgullo de ter culminado este obxectivo, de dar este paso tan importante nesta aventura. Temos moitas ganas de que o público escoite as cancións e que á xente lle poidan servir dalgún xeito, como nos sirven a nós para navegar nesta realidade”, afirman.
Traxectoria
Dende que LaMontagne e PicoAmperio comezaron xuntos a súa andaina no 2019 sempre se caracterizaron pola intertextualidade e pola súa conexión entre poesía e música, case hipnótica, concibindo as cancións como “textos completos que existen para descifrar” e tamén como “unha resposta á cultura herdada”. Alí onde se fusionen a vangarda e a tradición atlántica estará sempre seu punto de encontro, sendo capaces de establecer pontes coas literaturas de antano para traelas de volta ao presente a través de sons futuristas e tecnolóxicos. Entre os seus recoñecementos destacan o Premio Martín Códax da Música ao mellor proxecto de “músicas urbanas” e o primeiro posto nas listas demoscópicas 2019 de Mondosonoro, que só dan boa mostra de que a súa imparable expansión é unha viaxe sen retorno que xa comezou.
